УПРАВА ЗА ЕЛЕКТРОНСКО ЗДРАВСТВО

Управата за електронско здравство е орган на државна управа во состав на Министерството за здравство со својство на правно лице која врши стручни работи од значење за развојот и унапредувањето на интегрираниот здравствен информатички систем, како и формирање на концепти за развој на здравствената политика врз основа на добиените анализи од податоците внесени во националниот систем. Основана е на 1 јуни, 2015 година, како продолжение на претходно постоечкиот оддел во Министерството за здравство. Располага со персонал од 17 вработени. Се состои од  информатички експерти, економисти, правници, лекар.

Нејзиниот императив е имплементација на стандардите и протоколите согласно законската регулатива и директивите на ЕУ и како и на други релевантни меѓународни стандарди. Со други зборови, Управата за електронско здравство е посветена на нејзината улогата на посредник меѓу релевантните меѓународни институции и МЗ во организацијата на едукативни активности во прашања поврзани со унапредување на постоечките закони и стратегии.

Од 2011 година, Националната програма за незаразни болести, годишно одобрува унапредена “Програма за рана детекција на малигни заболувања во Република Македонија” поставувајќи ги темелите за Програмите за рано откривање на ракот на дојката и грлото на матката. Управата за Електорнско здравство е вклучена во овие скрининг програми, како и во обединување на податоците и од регистарот на малигни неоплазми.

Краткорочните и среднорочни приоритети на  Управата се поставени во нејзината Прва стратегија за развој на национален интегриран здравствен информатички систем (2006) и веќе се спроведуваат.

Со понатамошна соработка со соодветните ЕУ институции веќе се развива нова стратегија, која се базира на Стратешкиот план на Министерството за здравство (2016-2018) и Одлуката на Владата за воспоставување на стратешки приоритети (2016).  Новата стратегија предвидува понатамошно вклучување на електронскиот здравствениот систем на сите нивоа во здравствената мрежа како нејзин долгорочен стратешки план, а со приоритет – приклучување на македонскиот интегриран здравствен информатички систем кон системот за прекуграничен пренос на податоци во електонската здравствена мрежа на ЕУ.

Организациската структура и надлежностите на Управата се дефинирани во Законот за здравствена заштита. (Органограм)

Надлежности на Управата се:
• Надградба на интегрираниот здравствен информатички систем со нови функционалности кои се потребни и кои ги користат здравстените установи кои спаѓаат во мрежата на здравствени установи
• Оптимизација и одржување на програмските модули и функционалности кои се во склоп на националниот систем за електронски евиденции во здравството;
• Изработка и одржување на веб сервиси за интеграција и размена на податоци со органи на дравната управа, како и со софтерски решенија кои се во употреба во здравствените установи кои спаѓаат во мрежата на здравствени установи;
• Предлагање за дефинирање на работните должности, овластувањата и обврските на здравствените работници и раководните органи на здравствените установи во однос на функционалностите на интегрираниот здравствен информатички систем и листите на закажани интервенции;
• Предлагање на министерот за здравство концепти за развој на здравствената политика врз основа на добиените анализи од податоците внесени во интегрираниот здравствен информатички систем;
• Предлагање на стандарди за најкратко и најдолго времетраење на специјалистичко-консултативниот преглед по специјалност во амбуланта;
• Предлагање на распоред за работа на вработените во здравствените установи, како и план за работа преку дефинирање на оптимален број на амбулантски прегледи по лекар или медицински апарат, број на амбуланти за одредена специјалност, како и други параметри за непречено функционирање на интегрираниот здравствен информатички систем во поглед на листите на закажување на прегледи и интервенции;
• Контрола на придржувањето на стандарди и протоколи при работењето на здравствената установа во однос на примената на функционалности од интегрираниот здравствен информатички систем и електронската листа на закажани прегледи и интервенции;
• Управување и унапредување на интегрираниот здравствен информатички систем;
• Дефинирање и ажурирање на кодни табели со кои се разменуваат податоците во централната база на интегрираниот здравствен информатички систем со медицинскиот софтвер кој се користи во здравствените установи во Република Македонија;
• Оптимизација на постојните системи за електронска евиденција во здравството и нивна интеграција во еден колаборациски систем вклучувајќи ги сите надлежни институции;
• Вршење на обука на здравствените работници и здравствените соработници во здравствените установи за користење на интегрираниот здравствен информатички систем и сите негови функционалности.
• Сертификација и одобрување за користење и продажба на софтверски решенија кои се користат во здравстевните установи во состав на мрежата на здравствени установи;
• Изготвување на анализи и извештаи кои ќе ги користи Министерството за здравство, Агенцијата за лекови, Владата на Република Македонија, Државниот санитарен и здравствен инспекторат, Институтот за јавно здравје, Агенцијата за акредитација на здравствените установи, Фондот за здравствено осигурување и други субјекти од областа на здравството;
• Управување со комуникацискиот центар за техничка поддршка на сите корисници на интегрираниот здравствен информатички систем, и
• Создавање и одржување на база на податоци од интегрираниот здравствен информатички систем .