Shëndeti riprodhues i grave është një nga aspektet kyçe për shëndetin dhe mirëqenien e përgjithshme. Ministria e Shëndetësisë e Republikës së Maqedonisë së Veriut zbaton Programin e skriningut për zbulimin e hershëm të kancerit të qafës së mitrës, me qëllim rritjen e ndërgjegjësimit për rëndësinë e kontrolleve të rregullta dhe masave parandaluese.

Rëndësia e PAP testit

PAP testi është një metodë e thjeshtë, pa dhimbje dhe efektive për zbulimin e ndryshimeve anormale në qelizat e qafës së mitrës. Zbulimi i hershëm i këtyre ndryshimeve mundëson ndërhyrje dhe trajtim në kohë, duke ulur ndjeshëm rrezikun e zhvillimit të kancerit. Testimi i rregullt është jashtëzakonisht i rëndësishëm, sepse kanceri i qafës së mitrës shpesh nuk ka simptoma të dukshme në fazat e hershme, por mund të parandalohet me sukses nëse zbulohet me kohë.

Regjistrimi elektronik për PAP test

Si pjesë e përpjekjeve për përmirësimin e qasjes në shërbimet shëndetësore, që nga viti 2022 është mundësuar regjistrimi elektronik për PAP test. Kjo iniciativë i mundëson çdo gruaje që dëshiron të kryejë PAP testin të regjistrohet në mënyrë të thjeshtë dhe të shpejtë.

• Me plotësimin e formularit elektronik, pacientja regjistrohet për testin drejtpërdrejt në sistemin Moj Termin.

• Gjinekologu amë merr automatikisht njoftim për regjistrimin, pa pasur nevojë për telefonata shtesë apo vizita në ordinancë.

Si funksionon procesi?

Regjistrimi – Pacientja regjistrohet për PAP test përmes formularit elektronik në sistemin Moj Termin.
Njoftimi – Gjinekologu amë merr informacion për regjistrimin e kryer.
Caktimi i terminit – Sipas orarit të testimit, gjinekologu amë e kontakton pacienten dhe e informon për datën dhe orën e saktë të testimit.
Lëshimi i udhëzimit – Mjeku amë lëshon udhëzimin përkatës për PAP test, duke e bërë më të lehtë qasjen në këtë shërbim të rëndësishëm shëndetësor.

Pse është e rëndësishme të bëni PAP test?

• Mundëson zbulimin e hershëm të ndryshimeve prekanceroze dhe ndërhyrje në kohë.

• Ul rrezikun e zhvillimit të kancerit të qafës së mitrës.

• Është procedurë e shpejtë, pa dhimbje dhe e qasshme.

• Kontrollet e rregullta janë parandalimi më i mirë për ruajtjen e shëndetit tuaj.

Përfshihuni në program

Ministria e Shëndetësisë i inkurajon të gjitha gratë ta shfrytëzojnë këtë të drejtë dhe të kryejnë rregullisht kontrolle gjinekologjike parandaluese. PAP testi është një mënyrë e thjeshtë për të mbrojtur veten dhe shëndetin tuaj.

Për më shumë informacione rreth programit dhe për caktimin e PAP testit, vizitoni faqen zyrtare të Ministrisë së Shëndetësisë ose kontaktoni gjinekologun tuaj amë.

60 vdekje për shkak të kësaj sëmundjeje

Qëllimi kryesor i këtij programi është të ulë incidencën dhe vdekshmërinë e grave nga kanceri i qafës së mitrës në Republikën e Maqedonisë së Veriut. Përveç këtij qëllimi, programi i depistimit synon gjithashtu të:

Rritë numrin e personave të mbuluar nga depistimi i organizuar.

Rritë ndërgjegjësimin tek gratë për rëndësinë e ekzaminimeve të rregullta parandaluese dhe përfshirjen në këtë depistim të organizuar.

Rritë numrin e gjinekologëve të përfshirë në depistimin e organizuar.

Kush e drejton atë?

1. Gjinekologë primarë të përzgjedhur në nivel kombëtar.

2. Laboratorë citologjikë nga ISHP.

Për kë është i destinuar?

Organizata Botërore e Shëndetësisë rekomandon që gratë e përfshira në depistim të jenë të moshës 21 – 59 vjeç.

Çdo grua ka të drejtë të bëjë një PAP test te gjinekologu i saj primar në kuadër të qëllimeve parandaluese që duhet të arrijë në përputhje me marrëveshjet e nënshkruara me Fondin e Sigurimeve Shëndetësore të Republikës së Maqedonisë së Veriut.